जीवन जगताना प्रत्येकाला सातत्याने वेगवेगळ्या परिस्थितींचा सामना करावा लागतो. प्रत्येक व्यक्तीची परिस्थिती वेगवेगळी असते. जगण्यासाठी शारीरिक स्वास्थ्य, कौटुंबिक सौख्य, आर्थिक सुबत्ता, चांगली नोकरी, व्यवसाय, चांगले मित्र आणि सहकारी आवश्यक असतात. सगळ्यांना ते मिळतात असे नाही. आहे त्या प्राप्त परिस्थितीमध्ये प्रत्येकाला जीवन जगावे लागते, समस्या सोडवाव्या लागतात. संघर्ष करावा लागतो. आजच्या काळात जीवन जगताना असंख्य प्रकारच्या अडचणींना विविध स्तरांवर तोंड द्यावे लागते. तंत्रज्ञानाच्या अभूतपूर्व प्रगतीमुळे एकीकडे सुखाची साधने वाढली आहेत. जीवन अत्यंत गतिमान झाले आहे. संपत्ती, समृद्धी वाढते आहे. त्याच वेळी नवनवीन संकटांची मालिकाही वाढत आहे. सायबर क्राईम, ढासळती समाजव्यवस्था, हिंसाचार, नैराश्य, बेरोजगारी, संघटित गुन्हेगारी, वाढता वैद्यकीय खर्च, चंगळवाद, एक ना अनेक... आपल्या आजूबाजूची परिस्थिती तर इतकी विचित्र बनते आहे की माणसं एकलकोंडी होत आहेत. संभ्रमित, भयकंपित होत आहेत. त्यातून आत्महत्या, घटस्फोट, मानसिक आजार, सामाजिक अस्थिरता वाढत आहे. कोणाशी बोलावं, कुणाकडे आपले मन मोकळे करावे, कोणाचे मार्गदर्शन घ्यावे हे कळत नाही. समुपदेशक आणि मानसशास्त्रज्ञ पूर्णतः पाश्चात्य ज्ञानाचे तज्ञ असतात आणि त्याच पद्धतीने ते समस्या सोडवण्याचा प्रयत्न करतात. त्यातून समस्या अधिक गंभीर होतात. खरंतर भारतीय सनातन हिंदू धर्म ही एक जीवन पद्धती आहे. सर्वोच्च न्यायालयाने ही तसा निवाडा दिला आहे. गेल्या हजारो वर्षांपासून जीवित आणि प्रवाहित असणाऱ्या या संस्कृतीमध्ये जीवन विद्या म्हणजे जीवन कसे जगावे या संदर्भात परिपूर्ण मार्गदर्शन केलेले आहे. मानवाचा जन्म कसा होतो? जीवन म्हणजे काय? जन्मापासून मृत्यूपर्यंतचा प्रवास कसा असतो? जीवन कसे जगायचे? जीवनाचे चार भाग - ब्रम्हचार्याश्रम, गृहस्थाश्रम, वानप्रस्थाश्रम आणि संन्यासाश्रम तसेच चार पुरुषार्थ - धर्म, अर्थ, काम, मोक्ष यांच्या संतुलनातून यशस्वी जीवनाचे सूत्र मांडले गेले. जीवनाची ध्येय निश्चितीपासून व्यवसाय, नोकरी, आर्थिक स्थैर्य, आरोग्य, वैयक्तिक आणि कौटुंबिक नातेसंबंध, शिक्षण, विवाह, प्रापंचिक जीवन, समाजाबरोबर समाजात राहणे याबाबत विस्तृत आणि प्रॅक्टिकल ज्ञान भारतीय जीवन पद्धतीमध्ये सांगितले गेले आहेत. विशेषतः सर्व प्रकारच्या संघर्षांना कसे सामोरे जायचे आणि सुखी, आनंदी आणि समाधानी जीवन कसे जगायचे त्याचे सविस्तर मार्गदर्शन भारतीय ज्ञान परंपरेमध्ये वर्णिलेले आहे. त्यातूनच हा जीवन विद्या प्रशिक्षक असा अभ्यासक्रम तयार केला आहे. आज चाळीशी, पन्नाशीतंच काय निवृत्तीनंतरही माणसाला आपल्या जीवनाचे ध्येय कळत नाही. आपल्या जगण्याचे ध्येय आणि उद्दिष्ट कळत नाही. कारण त्याने जीवनाचा कधी गंभीरपणे विचारच केलेला नसतो. केवळ जिवंत आहे म्हणून जगायचे असेच जीवन सुरू असते. खरंतर जीवन विद्या ही एक कला आहे, तसेच शास्त्रही आहे. तिचा नीट उपयोग केला तर कोणीही निःश्रेयस अभ्युदय अशी जीवनाची सर्वांगीण प्रगती करून घेऊ शकतो. सुखी आणि समृद्ध आयुष्य जगू शकतो. ऐहिक जीवनात संपूर्ण प्रगती आणि अध्यात्मिक जीवनाचा विकास अशा दोन्ही गोष्टी साध्य होऊ शकतात. याचेच नाव जीवन विद्या असे आहे. त्याचे प्रशिक्षण या अभ्यासक्रमात दिले जाणार आहे.